Ginhingyo sang presidente sang Bacolod City Public School Teachers Federation nga iregulate lang ang paghatag sang homework sa mga estudyante sangsa idumili sa mga manunudlo ang paghatag sang homework ukon assignment kun weekend.
Ini ang kasunod sang pagduso ni Senator Bong Revilla sang “No Homework Act of 2023” nga magadumili sang paghatag sang homework sa elementary pupils kag junior high school students kun Sabado kag Domingo agud nga may tiempo ang mga ini sa ila nga pamilya.
Sa interview sang Bombo Radyo kay Richard Gelangre, nakibot ini sa hagna nga ginpropose ni Senator Ramon “Bong” Revilla Jr. nga wala na sang ihatag nga homework para sa mga estudyante sang elementary kag junior high school kun weekend.
Suno kay Gelangre, ang assignment ang makahatag sang oras para sa estudyante nga magtuon sa kaugalingon nga pamaagi sini bangod nga indi tanan nga pagtulon-an ang makuha ukon maintindihan sang bata sa sulod sang classroom.
Ginklaro man sini nga indi isa ka penalty ang assignment kundi bulig para sa mga kabataan para sa ulihi kun magtrabaho na ang mga ini.
Aminado man si Gelangre nga may yara sang mga manunudlo nga kun kaisa nagahatag sang madamo nga assignment kag naintindihan man sini ang kabudlayan sang mga ginikanan sa pagtutok tudlo sa kabataan.
Gani, iya ginhingyo nga mas maayo kun iregulate lang ang paghatag sang assignment.
Pahayag ni Gelangre, pagaistoryahan sang mga manunudlo nga ischedule ang paghatag sang assignment nga kun mahimo sa isa ka adlaw may yara lamang sang duha ka assignment gikan sa duha ka subject nga indi magtingob tanan.
Dugang pa ni Gelangre, mas maayo kun gintutukan sang gobyerno ang increase sang budget para sa edukasyon, dugang nga instructional materials, gadgets kag dugang nga mga manunudlo sangsa pasilabtan ang homework.
