Ginpahanumdom sang obispo sang Diocese of San Carlos ang kahulugan sang Ash Wednesday.
Sa interview sang Bombo Radyo kay Bishop Gerardo Alminaza, ang Ash Wednesday ang panugod sang Kwaresma ukon 40 ka adlaw nga Lenten season.
Ang abo nga ginapalhit sa agtang ang nagikan sa mga lukay nga ginbendisyunan sang Domingo de Ramos tinalikdan nga tuig.
Ini ang ginasunog antes ang Miyerkules de Badlis.
Sang ginbunyagan ang tumuluo suno kay Alminaza, ginmarkahan ini sang krus bilang pahanumdom nga ginluwas kita sang Ginuo paagi sa pagpalansang sa krus nga tanda sang paghigugma.
Sa Ash Wednesday, ginarenew sang tumuluo ang ginsumpa sang tiempo sang bunyag nga padayon ang aton pagkasumulunod kag seryoso nga pagtuon sang iya nga paagi agud nga magluntad ang paghidaet.
Subong nga Miyerkules de Badlis, ginpahanumdom sang Santo Papa nga ang Ginuo ang nagdala sang tatlo ka gintutun-an sa Bukid sa Pabor kun sa diin nakit-an nila nga nagbag-o ang iya dagway.
Ini ang isa ka pahanumdom sa tanan nga sa panahon sang Kwaresma, maghatag kita sang tinion agud nga magtaklad sa spiritual nga bukid agud lantawon kun sa diin ini padulong.
Suno kay Alminaza, dapat synodal ukon nagaupdanay ang mga tumuluo bilang katilingban sa pagsunod sa Ginuo bangud mabudlay ang pangabuhi nga wala nagaululupod. Samtang, gin-athag ni Bishop Gerardo Alminaza nga boluntaryo lang ang pagpabutang sang mga Romano Katoliko sang abo sa agtang kun Miyerkules de Badlis nga panugod sang 40-day Lenten Season.
Sa interview sang Bombo Radyo kay Alminaza, ginahambal sang pari nga sa abo kita naghalin kag sa abo kita magabalik.
Suno diri, luyag sang Diyos nga maluwas ang tanan apang hilway ang tanan nga magpili kun magsunod ini sa kasuguan ukon maglapas.
Kun Ash Wednesday, hilway ang tanan nga magpabadlis ukon indi.
Kun maglinya agud nga magpapalhit sang abo sa agtang suno sa obispo, dapat nga hilway nga nagadeklarar publicly nga seryoso ini sa Kwaresma nga sundon ang disiplina sang Lenten season.
Ang tatlo ka haligi sang disiplina sang Karesma ang ginalakipan sang prayer, fasting kag alms giving.
Buot silingon, pabaskugon pa gid sa sulod sang 40 ka adlaw ang pagpangamuyo, pagpakig-angot sa Ginuo, updan sang puasa kag abstinence sa karne kag pagbulig sa iban nga nagakinahanglan.
Suno diri, nagapuasa ang tumuluo agud nga makaangkon sang self control kag mastrategize nga ang ginapili nga desisyon ang santo sa gusto kadtuan nga ang ginharian sang Diyos kag kabuhi nga dayon.
Ini ang dapat man nga magresulta sa kaayo sa isigkatawo ilabi na sa nagakinahanglan.
