Nagdesisyon ang local market committee nga iisol ukon ipostpone anay ang raffle para sa mga vendors nga magaokupar sang pwesto sa annex building sang Libertad Public Market.
Ini matapos nga nagreklamo ang dumaan nga mga vendors nga wala sila sang listahan sang igaraffle kundi mas ginpasulabi pa ang mga bag-uhanon kag indi taga-Bacolod.
Sa interview sang Bombo Radyo kay City Administrator Atty. Pacifico Maghari, nagsapol sila kaina sang aga kag diri nadesisyunan nga ipostpone ang raffle.
Suno diri, igarevisit kag igadouble check ang masterlist.
Bangud sini, ginmanduan ang mga market supervisors nga magsumiter sang kumpleto nga listahan kag ang wala nadala sa masterlist agud nga maverify kag mangin patas sa tanan.
Suno kay Maghari, igasubmit man ang ngalan sang wala sa masterlist bangud pangitaan ini sang paagi nga indi man sila madulaan sang palangabuhian.
