Nagtuga sang gamo sa mga vendors sang Libertad Public Market sang mahibaluan nga wala nalakip ang ila pangalan para sa raffle nga makakuha sang pwesto sa annex building.
Sa interview sang Bombo Radyo kay Nero Rama, iya ginpahayag nga indi husto ang ginhimo sa ila bilang aktwal nga miyembro kag aktwal nga nagabaligya sa nasambit nga merkado sa sulod sang 29 ka tuig, nga madamo sang miyembro ang wala sang pangalan sa lista.// Suno diri, wala natigayon ang pa-raffle kahapon sang ila nakita nga may madugay na nagabaligya nga wala sa lista apang ang mga bag-ohan amo ang may pangalan sa raffle, kasubong man nga may yara sang nagadoble ang pangalan.
Apang sang ila naman kun tani gusto nga sturyahon ang nagapalakat sa merkado, wala naman sila gina-atubang.
Kwestyon sini, kun paano nga may yara sang survey nga natabo, apang ang mga pangalan naman nila ang nagkaladula.
Suno naman kay Letecia Palacios kag Felicedad Torres, lunsay mga manugbaligya sa Libertad Market nga wala nalakip ang pangalan sa lista, padayon nila nga ginaduso nga ang orihinal nga census ang basehan nga lista para makakuha sang pwesto sa annex building.
Suno sa mga manugbaligya, ila ginahingyo nga mabalik lang sa ila ang ila nga pwesto, ilabi na nga may yara sang mga pangalan nga indi tumandok sang siyudad.
Pahayag ni Torres, posible nga nagparehistro ang mga bag-ohan sa comelec kag nagkuha saNg residency amo nga nakasulod ang mga pangalan sang mga ini.
Ila man gusto nga ipalab-ot sa alkalde sang siyudad, Mayor Alfredo Benitez nga mahimo sini magpalapit kag lantawon ang sitwasyon sang mga negosyante sa Libertad Public Market nga indi lang magmando kundi magpadulong man sa ila. SAMTANG nagaapela ang Libertad-Burgos-Central Market Vendors Association nga hatagan sang city government sang prayoridad ang dumaan nga mga vendors nga ibutang sa annex building sang merkado kag ang bag-uhanon lang ang iraffle.
Sa interview sang Bombo Radyo kay Jojo Moyani, presidente sang Libertad-Burgos-Central Market Vendors Association nga may 83 ka miyembro nga nagabaligya sa Libertad Market, dumaan na nga nagabaligya sa merkado ang ila nga mga miyembro gani sila ang dapat nga hatagan sang prayoridad.
Sang nagsapol sa Bacolod City Government Center, nagpasa ini sang 83 ka ngalan sang mga vendors kay City Administrator Atty. Pacifico Maghari, apang sa karon naglab-ot ini sa 500.
Suno diri, malapit lang 200 ka vendors ang maigo sa Libertad Public Market gani indi mag-igo diri ang 500.
Nagapanindugan si Moyani nga unahon kuntani sang city government ang dumaan kag good standing ukon nagabayad sang arkabala kag Bacolodnon, samtang iraffle naman ang bag-uhanon nga nagsulod.
Suno kay Moyani, nanigulang na sa merkado ang iban nila nga miyembro apang sila pa ang wala nalakip sa listahan kag nauna pa ang bag-uhanon.
Bangud sini, nagsuggest ini kay Maghari nga ireview ang tanan nga listahan agud nga matumod kun sanday sin-o ang dumaan, legitimate kag sin-o ang bag-uhanon.
Suno diri, nagasunod sila sa pagsulundan kag indi man ini gusto nga mangin violator ang ila nga mga miyembro.
