Ginpahayag sang chairperson sang Committee on Markets and Slaughterhouse sa Sangguniang Panlungsod nga may yara sila sang ihatag nga option sa mga vendors sa Libertad Public Market nga indi madala sa raffle.
Sa interview sang Bombo Radyo Bacolod kay Councilor Celia Flor, nagpatigayon sang meeting ang local market committee sang syudad sang Bacolod kun sa diin nadesisyunan nga ipostpone nalang ang raffle sang mga pwesto sang mga market vendors sa Libertad kag Burgos Public Market bangud magapatigayon sila sang revalidation sang data sang mga vendors.
Ginpahayag man ni Flor nga bangud may postponement dapat ang mga merkado ang magabutang sang pagsulundan sa raffling kag dapat hatagan sang nagakaigo nga panahon ang mga vendors nga makahibalo sang insakto nga impormasyon angot sa patigayunon nga raffle sang ila mga pwesto.
Suno diri, sa Libertad Public Market, nahibaluan na nga may yara sang kakulangan ang pwesto bangud ang mga vendors nga nagarenta sa palibot sang Libertad Market ang nagdangat sa masobra 500.
Suno kay Flor sang pagpatigayon nila sang survey, nagdangat nalang sa 300 bangud sa survey ginalantaw ang actual nga nagabaligya sa mga stalls.
Aminado man ini nga madamo sang claims kaangay lamang sang nagbaligya apang sang pagsurvey sa diin isa sa nakita nga rason nga wala ang mga ini sa masterlists kag ang iban nga transient posible man nga ginpahulam nila ang ila nga stalls sa iban man nga nagabaligya.
Ginalantaw nga sa March 1 magaresume ang raffle.
