Patay ang nagamaneho sang motorsiklo matapos nga makabunggo sa likod sang nagapundo nga truck sa Purok Kamunsil, Circumferential Road Brgy Banago, syudad sang Bacolod sang Martes sang gab-i.
Ginkilala ang biktima kay Ruben Canayan, 39 anyos kag residente sang Bangga Totong, Brgy. Felisa syudad sang Bacolod.
Sa interview sang Bombo Radyo Bacolod kay PMaj. Armilyn Vargas, station commander sang Bacolod Police Station 3, sakay si Canayan sa iya motorsiklo halin sa Puno Banago pakadto sa nakatungdan nga direksyon sang aksidente sini nga nabungguan ang pangulihi nga parte sang truck nga nakapundo sa kilid sang dalan nga ginamaneho ni Noel Maquiñana, 62 anyos sang Barangay Mantaangan, banwa sang EB Magalona.
Suno kay Vargas, dead on the spot ang biktima kag indi man maklaruhan kun hubog ini nga nagamaneho sang motorsiklo.
Wala man naggamit sang helmet ang biktima kag madasig man ang pagpadalagan sini santo man sa mga samad nga naagom sini.
Nakaestoryahanay na ang magtimbang nga bahin kag willing man maghatag sang assistance ang tag-iya kag driver sang truck.
