Nagalaom ang mga manugbaligya sang prutas sa Libertad Public Market nga pahanugutan sila nga magpwesto na lamang sa side walk ukon sa gutter agud indi na maglibot ang mga manugbakal kag ihatag na lamang ang ila pwesto sa annex building sa iban nga mga vendors.
Suno kay Rosemarie Alvarez, ila nakasugtan nga isulon ang ila pwesto sa side walk ukon sa gutter agud makit-an sila ni Councilor Celia Flor, chairman sang Committee on Markets and Slaughterhouse kag Mayor Alfredo Benitez.
Suno kay Alvarez, kun sa sulod sang annex building sila mapwesto, malibot pa ang manugbakal samtang kun yara lamang sila sa sidewalk, mas matawhay, madasig makabakal kag malapad pa ang pwesto.
Suno diri, ila ini ginpalab-ot kay Flor kag ginpahayag sang konsehal nga indi pa siya makaugyon bangud kinahanglan pa ini nga ipasa sa Sangguniang Panlungsod kag magaagi pa sa proseso.
Suno sa iya, 39 tanan ang mga fruit vendors sa Libertad Public Market apang 26 lamang ang pwesto para sa mga ini sa Annex Building.
Kaina, 32 ka mga vendors ang nagpwesto sagwa.
Naga-ayo ang mga ini nga pahanugutan na lamang sila nga sa sidewalk ukon sa gutter magpwesto kag ihatag na lamang sa iban nga vendors ang 26 ka mga slots sa sulod sang annex building.
Sang ginpabunot ini sa raffle, makaduha ka beses siya nga nakabunot sang “Better Luck Next Time” kag masakit para sa iya bangud humalin 1970, nagabaligya na ini sa Libertad kag hinali na lamang nga madulaan sang pwesto kag pasudlon ang mga bag-o.
Ginpakamaayo naman sini nga ginpauntat ang raffle agud makapatigayon sang survey ang mga opisyal agud mahibaluan kun sanday sin-o gid ang actual nga nagabaligya.
