Patay ang isa ka barangay kagawad sang Barangay Cambayobo sa banwa sang Calatrava, Negros Occidental matapos gintiro sang wala makilal-an nga suspetsado sa gwa lang sang ila nga balay sang Miyerkules.
Ginkilala ang biktima kay Benito Hubahib, legal ang edad kag residente sang nasambit nga lugar.
Sa interview sang Bombo Radyo Bacolod kay Police Captain Jesus Alba, deputy chief of Police sang Calatrava Municipal Police Station, nakumpirmar sang mga ini nga ang ginpatay sang mga armado nga mga tawo amo si Barangay Kagawad Hubahib kag nakaangkon sang pilas sa ulo kag dughan sini nga gintunaan sang iya kamatayon.
Suno kay Alba, narecover sang mga ini sa crime ang apat ka fired cartridge sang calibre 45 kag tatlo ka 5.26 m16 rifle.
Suno sa hepe nakita nila nga motibo sa pagpatay sa biktima ang nangin witness ini sa operasyon sang Philippine Army sang January 7, 2023 kun sa diin nadakpan ang tatlo ka mga matag-as nga opisyal sang New Peoples Army, nga ginlakipan sang duha ka babayi kag isa ka lalaki nga si Felix Sucas, ang commander sang North Negros Front.
Suno pa diri ang biktima ang nagwitness man sang marking sang ebidensya nga ginalakipan sang subersibo nga dokyumento, pusil kag mga bala nga nakuha sang mga otoridad.
Ginalantaw man nga madamo nga mga armado ang nagpalibot sa balay sang biktima kun sa diin ini ang ginpatay.
Suno kay Alba ang balay sang biktima ang nahamtang man sa nabanglid nga bahin sang Barangay.
Indi pa makumpirmar kun NPA ang nagpatay sa biktima apang nagahulat lamang sila sang kumpirmasyon paagi sa press release nga ipagwa sang rebelde nga grupo.
Nagapadayon sa karun ang imbestigasyon sang Calatrava Municipal Police Station agud matumod ang napatay sa biktima.
