Nagpadulong sa estasyon sang Bombo Radyo ang isa ka tricycle driver nga ginhingadlan lamang kay Alyas Neneng agud magpangayo sang bulig bangud ini ang ginticketan kag ginkuha ang iya lisensya apisar nga nagapanindugan ini nga siya ang indi colorum nga magabakal lamang kuntani sang bulong.
Suno kay Alyas Neneng, nagdulog ini sa atubang sang isa ka botika agud magbakal sang bulong sang siya ang ginticketan sang personnel sang Bacolod Traffic Authority Office (BTAO) nga si Sir Castaña sa sugo ni Sir Dela Peña.
Suno diri, nagrason ini nga siya ang magabakal sang bulong bangud siya ang nagasuprer sang stroke kag ginpakita ang reseta sang iya maintenance.
Nasakitan man ini sa ginbuya nag tinaga sang personnel nga nagakwestiyon kun ngaa siya ang nagadrive pa sang motorsiklo apisar nga ini ang may stroke.
Suno sa iya, wala ini sang suguon gani siya na lamang mismo ang nagmato-mato bakal sang bulong sini.
Suno diri, wala ini nagabyahe kag wala sang pasahero ang iya bangko bangud bag-o lamang niya gindul-ong ang iya asawa.
Suno kay Alyas Neneng, ang tricycle ang iya lamang ginagamit kun magdul-ong sang iya asawa kag kun ini ang may kadtuan.
Nagapanawagan ini nga kuntani lantawon ang physical condition sang isa ka persona kag lantawon ang sitwasyon kun ano ang tinutuyo sini bangud siya ang nagpakita man sang identification card nga nagapakita nga siya ang isa ka person with disability (PWD) kag reseta.
Nagapanindugan ini nga indi siya colorum kag mabug-at para sa iya ang P1,500 nga kinahanglan sini bayaran agud mabawi ang iya lisensya.
Nagapakig-angot sa karun ang Bombo Radyo sa pamunuan sang BTAO agud maathag ang natabo kag makuha ang ila bahin.
