Nagapati ang isa ka Human Rights lawyer kag anay prosecutor sa Bacolod nga indi isa ka rebolusyon ang natabo sa EDSA People Power sang 1986 bangud wala ini sang may nakit-an nga pagbag-o.
Sa interview sang Bombo Radyo kay Atty. Cesar Beloria, sa tion sang Martial Law, siya ang isa ka practicing lawyer kag ang iya utod ang ginpatay sang mga militar bangud nagapakigbahin ini sa hublag.
Siya ang ginpriso sa Cebu sang 1973 kag nakagwa sang 1974.
Suno kay Beloria, bilang isa ka abogado kag estudyante sang Philosophy kag History, luyag sini ipalab-ot nga ang natabo nga EDSA People Power ang indi mapanindugan nga isa ka revolution bangud ang nagapungko lamang sa pwesto ang naglain apang wala sa gihapon sang pagbag-o.
Suno diri, ginsuguran ini sang mga kubos, mangunguma kag mga mamumugon apang sang nagahilapit na nga maagaw ang pulungkuan sang diktadorya, may nagsal-ot nga mga personalidad.
Suno diri, indi rebolusyon ang natabo nga People Power kundi uprising interference lamang sang mga imperialist kag mga minions sini.
Ang iya ginatumod amu sanday former President Fidel V. Ramos kag Juan Ponce Enrile, nga amu ang nagdesinyo sang proklamasyon sang Martial Law.
Suno sa iya, ang hitabo ang indi matuod-tuod nga socio-cultural revolution kag ginhangkat sini ang mga Filipino nga magtuon sang maragtas sang pungsod kag kalibutan.
Suno diri, ang rebolusyon ang nagapatimaan sang pagbag-o apang wala sang pagbag-o nga natabo kag nagapabilin ang aristokrasya sa pungsod.
Indi revolution ang natabo bangud ini ang ginsal-utan sang mga aristocrats kag gindesinyo agud madefer ang accomplishment kag goal sang mga Filipino nga nag-antos sang pila ka tuig.
Suno sa iya, dapat nga dumdumon ang hitabo bilang isa ka leksyon agud makit-an ang kakulangan sang pungsod kag makit-an ang sarang nga mahimo kun mag-isa ang mga pumuluyo.
Nagapati man ini nga matabo ang isa ka matuod-tuod nga rebolusyon sa pungsod.
