Mas pasanyugon pa sang Bacolod Police Station 4 ang presensya sang kapulisan sa ila area of responsibility matapos ang natabo nga pagpanghold-up sa isa ka food panda rider sa Atis Treet, Capitol Subdivision, Barangay Villamonte, Bacolod City kagab-i.
Madumduman nga ang biktima ang ginkilala nga si Rosalejos Aries, 34 anyos, kasado kag residente sa Block 92, Lot 10 Arao, Barangay Vista Alegre, Bacolod City.// Suno kay Aries, samtang siya ang on duty bilang food delivery rider sang hinali nalang ini nga ginbalabagan sang sugata nga itom nga Isuzu Rider sakay ang isa ka lalaki nga may dako nga panglawason suksok ang full helmet kag itom nga jacket.
Samtang nagpondo naman sa likod sini ang blue nga Isuzu rider nga motorsiklo sakay ang driver nga may medium built kag nakasuksok sang itom nga jacket kag full face helmet kag backrider sini nga kaangay man ang panglawason kag panapton.
Pahayag sang biktima nga siya ang gilayon nga ginkomprontar kag gintayaan sang armas-luthang sa ulo kadungan sa paghambal sang “cellphone kag kwarta lang kinanglan ko”.
Nataban gikan diri ang isa ka unit sang cellphone kag ang blue nga belt bag sini nga naga-unod sang kapin P3,500 nga cash collection.
Sa interview sang Bombo Radyo kay Police Captain Greeky Cayao, station commander sang Bacolod Police Station 4, nagapadayon pa ang ila imbestigasyon sa natabo.
Suno kay Cayao, mas pasanyugon pa sini ang police visibility sa lugar agud malikawan nga may matabo nga krimen.
