Patay ang 43-anyos nga lalaki matapos nakabunggo ang motorsiklo nga ginamaneho sini sa barandilya nga yara sa National Highway sang Purok Gumamela, Barangay Talacagay, Hinoba-an, Negros Occidental.
Sa interview sang Bombo Radyo kay Police Major Ramel Bustamante, hepe sang Hinobaan Municipal Police Station, ginkilala ang biktima kay Jose Lecera, 43-anyos, pamilyado kag residente sang Purok Sampaguita sa nasambit nga barangay kag banwa.
Suno kay Bustamante, nagikan sa baylehan ang biktima kag nakainom ini.
Suno sa pahayag sang iya himata, ginpunggan nila ini nga magpauli sang kaagahon apang siya ang nagpauli gid kag ginsundan pa sang iya hinablos apang tuman kadasig ang pagpadalagan sini kag wala na nalaot.
Sang kaagahon, nasapwan na lamang ini nga wala na sang kabuhi sa higad sang dalan.
Sa imbestigasyon, aksidente nga nagbunggo ang motorsiklo nga ginamaneho ni Lecera sa steel barrier sa dalan rason kun ngaa nakaangkon ini sang pilas sa nagkalain-lain nga bahin sang iya lawas.
Ginhingagaw pa ini dala sa ospital apang gindeklarar nga dead on arrival.
