Apisar nga malayo pa ang bulan sang Oktubre para sa Barangay kag SK Elections, nagpagwa na ang Commission on Elections (COMELEC) sang schedule of activities para sa nasambit nga piniliay.
Sa interview sang Bombo Radyo Bacolod kay Bacolod Election Officer Atty. Katrina Cania, sa March 6, patigayunon ang Election Registration Board meeting agud masala ang mga nag-apply para sa voters registration kag magaboto sa Barangay kag SK Elections sa bulan sang Oktubre.
Samtang sa July 3 tubtob 7 patigayunon ang filing sang certificate of candidacy, Lunes tubtob Biyernes halin alas 8:00 sang aga tubtob alas 5:00 ang takna sa hapon.
Suno kay Cania, indi na kinahanglan magpadulong sa COMELEC office sa syudad sang Bacolod agud magkuha sang COC bangud mahimo lamang ini nga madownload sa official website sang www.comelec.gov.ph.
Ang campaign period ang magaumpisa sa October 19 tubtob October 28 kag ang adlaw sang election ang October 30.
Suno sa election officer ang election period ang magaumpisa sa July 3 tubtob sa November 14.
Nagpanugyan si Cania sa tanan nga mga luyag nga magpadalagan para sa Barangay Chairman, Barangay Kagawad, kag SK Chairman kinahanglan nila nga magfile sang COC sang mas temprano agud nga kun may kinahanglan nga insaktuhon, macorrectionan gilayon.
