Padayon nga nagatinir sa Bacolod North Public Market sa dalan Burgos ang pila ka mga manugbaligya apisar sang natabo nga pagdemolish sang mga hayob hayob nga gintukod diri.
Sa interview sang Bombo Radyo kay Rosaly Gulantang, matapos ang pagdemolish sa ila, wala ini naghalin apang nagsaylo lamang sang pwesto sa sulod sang merkado.
Suno diri, apisar nga may yara sang naghalin matapos ang demolish madamo man sa gihapon ang nagpabilin, kag amo nga magamay na lamang ang ginansya sini.
Sila naman ginhingyoan ni Punong Barangay Jay R Alcantara sang Barangay 12, nga indi na magbalik apang bangod sa kapigaduhon kag wala sang mapulian, indi lamang sila nga nagatyangge ang nagtinir, may yara man sang mga indibidwal nga didto na mismo nagatulog.
Aminado man si Gulantang, mabudlay para sa ila kun matigayon ini nga ipasira.
Amo man nga nanagyo ini nga mahatagan sang saylohan kun sila mahimo nga pahalinon.
