Masobra P400 mil nga balor sang suspected shabu ang nakuha sa magnobyahanay sa ginpatigayon nga buybust operation sa Hacienda Sta. Ana, Barangay Palampas, San Carlos City sang Miyerkules sang aga.
Nakahunong na sa San Carlos City Police Station si Herfrance Tuhao, 21-anyos, single kag ginakabig nga high value individual kag residente sang Phase 4, Fatima Village, Barangay Rizal sang amo nga ciudad upod ang menor de edad.
Nakuha sa paghinakop sang mga ini ang 18 ka plastic sachets nga nagaunod sang suspected shabu lakip na ang buy-bust item, P1,000 nga buy-bust money, coin purse, kag sling bag.
Nagabug-at sang 63.51 grams kag may standard drug price nga P431,868.
Sa interview sang Bombo Radyo Bacolod kay Police Captain Roby Aurita, deputy chief of police sang San Carlos City Police Station, sa monitoring sang Station Drug Enforcement Team sang nasambit nga police station, si Tuhao ang konektado kay certain John Mark Quijano nga nakuhaan man sang milyon nga balor sang illegal nga druga.
Suno kay Aurita, si Tuhao ang nagakuha sang supply kay Quijano kag ginabaligya kaupod man ang iya nga 16 anyos nga nobya.
Suno diri, si Tuhao ang nakapaidalom na sa mandatory drug tests sa Negros Occidental Police Provincial Office (NOCPPO) samtang ang menor de edad nga nobya sini ang ginturn-over na sa Department of Social Welfare and Development (DSWD).
Ang duha pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
Si Tuhao ang may naman sadto sang 2019 nga paglapas man sa RA 9165 ukon Comprehensive Dangerous Drugs Act of 2002.
