Wala pa sang schedule ang lubong ni Negros Oriental Governor Roel Degamo bangud ginahulat pa ang utod sini nga nagikan sa Estados Unidos.
Sa interview sang Bombo Radyo Bacolod kay Grace Agabon, Public Information Officer sang Negros Oriental, dal-on ang bangkay ni the late Negros Oriental Governor Roel Degamo sa Provincial Capitol agud nga ihamyang didto sa Miyerkules (March 8) tubtob Domingo (March 12) antes ibyahe sa Siaton, Negros Oriental sa balay sang ginikanan sini kag kun sa diin siya ginbun-ag sa Domingo, March 12 tubtob sa Miyerkules, March 15.
Samtang napresent na kag napasakaan na sang kaso nga multiple murder ang mga nadakpan kag ginatudlo nga suspek sa pagmassacre sa anay gobernador kag walo ka iban pa.
Wala man ginpangalanan sang mga otoridad ang napatay matapos nga nagbato sa mga otoridad sa ginpatigayon nga hot pursuit operation sa Bayawan, Negros Oriental.
Gin-athag man sini nga wala lockdown sa Negros Oriental kag wala man ini ginpaidalom sa state of emergency apang madamo lamang sang mga kapulisan nga nagabantay agud magpatuman sang seguridad sa probinsya.
