Ginkumpirmar ni Negros Oriental 2nd District Board Member Nyrth Christian Degamo nga yara ini sa sulod sang compound sang balay ni Governor Roel Degamo sang natabo ang assassination sang Sabado sang aga apang maswerte nga luwas ang iya ginahamtangan.
Sa exclusive interview sang Bombo Radyo Bacolod sa board member, iya ginpahayag nga nag-abot ini sa compound ng gobernador alas-9:25 sa aga kag madamo na sang tawo sa sulod samtang nagaatubang naman sa ila ang gobernador.
Nagsulod ang board member sa balay kag nag-istorya sa iya tiya nga si Mayor Janice Degamo.
Pila ka minutos makaligad nga naggwa ang board member sa balay, nabatian sini ang linupok apang indi ini tuman katunog bangud mahimo nga may silencer ang armas sang mga suspects.
Nagsulod ang board member sa balay kag nag-untat naman ang linupok.
Makaligad ang pila ka minutos, nagkadto sa ila ang isa ka supporter nga may dugo na ang kamot sini kag nagsinggit sang tabang.
Luyag sang board member nga magkadto sa iya nga tiyo apang ginpunggan ini sang iban nga gwardiya bangud mahimo nga may mga suspects pa kag sila ang tiruhon.
Suno diri, mahimo nga napatay man ini kun wala siya nakahalin sa ginahamtangan sang gobernador.
Yara man sa balay si Mayor Janice apang nagahanda na ini para sa distribution sang ayuda sa 4Ps beneficiaries sa Pamplona.
Suno diri, maswerte lang bangud wala nakagwa si Mayor Janice bangud naandan na sini ang pag-istorya sa mga constituents.
Suno kay Nyrth, naurungan lang ini sang ginkumpirmar sang doktor nga nagtaliwan na ang gobernador.
