Ginkumpirmar ni Negros Oriental 2nd District Board Member Nyrth Christian Degamo nga madugay na nakabaton sang pagpamahog si Governor Roel Degamo antes pa man ang assassination sang Sabado sang aga.
Sa interview sang Bombo Radyo Bacolod, nagbalibad si Board Member Degamo nga maghatag sang komento sa statement nga ginpagwa ni 3rd District Congressman Arnie Teves nga wala ini sang kahilabtanan sa assassination sang gobernador.
Apang natingala ang board member kun ngaa defensive si Teves.
Suno kay Board Member Degamo, nalantaw niya ang statement ni Teves apang wala niya napatapos.
Suno sa opisyal, wala ini sang natalupangdan nga makaduluda sa palibot antes ang assassination sang Sabado kag nakita man niya nga malipayon si Governor Degamo.
Ginpasalig naman ni nagbulos nga gobernador nga si Carlo Reyes nga padayunon sini ang nasuguran na ni Degamo.
Suno sa board member, madugay na nakabaton sang death threat ang gobernador gani masami ini ginahambalan nga indi magkampante sa tion nga sila ang magkaupod.
Indi naman sini makumpirmar ang report nga may nabaton nga impormasyon ang gobernador nga may nag-abot sa Negros Oriental nga grupo sang armado nga mga lalaki sang tinalikdan nga semana.
Sang Setyembre tuig 2020, nagsulat si Governio Degamo sa pila ka mga senador agud mangayo sang bulig nga maproteksyunan ang iya pamilya nagikan sa alleged assassination attempts kun sa diin ginmention sini nga mastermind ang iya political rival nga si Negros Oriental 3rd District Rep. Arnie Teves.
Suno diri, padayon sila nga subject sang assassination plot nagikan sa grupo ni Teves nga kilala nga warlord, gambling lord kag drug lord sa ila nga probinsya kag may private armed group kag goons.
Nanugid ang gobernador sa mga senador nga naghingyo ini sang proteksyon nagikan sa Philippine National Police apang ginbalibaran ang iya nga request for security.
