Nagpanawagan ang Negros Occidental Police Provincial Office sa mga local officials nga indi magkataka nga manusgid sa ila kun may nabaton ang mga ini nga pamahog sa kabuhi.
Sang Lunes, ginmandu ni President Bongbong Marcos sa mga suldado kag kapulisan nga bungkagon ang private armies kag pangitaon ang looses firearms agud nga indi na matabo ang kaangay sang assassination ni Negros Oriental Governor Roel Degamo.
Nagmandu man ini nga tumuron ang hotspot areas sang mga krimen.
Sa interview sang Bombo Radyo kay NOCPPO spokesperson Police Captain Judesses Catalogo, igamonitor sang kapulisan ang mga possible hotspot areas bisan malayo pa ang eleksyon.
Ginhingyo sini ang mga government officials nga magpalapit sa mga kapulisan kag magsugid kun may nabaton nga mga pamahog agod nga mahatagan sang tikang para sa ila nga security.
Suno diri, wala pa sang aktwal nga data kun diin ang makabig nga hot spot areas samtang ila pa ini nga ginavalidate, kag ila man sa karun ginabasehan ang mga datos sang nakaligad nga eleksyon.
Luyag man sini ipalab-ot sa mga government officials nga indi magkampante nga wala sang may ginabaton nga pamahog kundi maghalong gid sa tanan nga tion.
Aminado naman si Catalogo nga nakabulig ang ila nga programa nga Armas Baylo Bugas agud makumbinsi ang mga nagahupot sang loose firearms nga magsurrender sini sa gobyerno.
