Ginpanginwala ni Punong Barangay Noli Villarosa ang alegasyon nga siya ang financier sang illegal Small Town Lottery (STL) sa ciudad sang Kabankalan, Negros Occidental.
Sa press conference nga ginpatigayon ni Villarosa, ginpahayag sini nga nagpadulong ini sa Kabankalan City agud mag-istorya sa mga punong barangay bangud siya ang gin-imbita nga magsulod sa isa ka party list nga ang pangalan amu ang STL ukon Saganang Tulong Lahat.
Suno kay Villarosa, may nagkadto sa iya nga legit operator sang STL nagikan sa Manila kag nagpahayag nga may yara sang franchise.
Iya ini gin-abisuhan nga dapat may nagakaigo nga business permit kag permit to operate.
Suno diri, sa sini man nga tion nga naga-istoryahanay sila sang mga punong barangay tuhoy sa party list gani iya napanumduman nga ipapangalan diri ang STL ukon Saganang Tulong Lahat.
Suno sa iya, wala ini sang kapasidad nga mangin financer sang illegal STL kag kun matuod gid man, kuntani madamo na siya sang kwarta kag sa iya kaugalingon nga barangay niya ini gina-operate.
Dugang pa sini nga kun naga-engage ini sa illegal nga STL, dapat nakahibalo ang iya mga kaupdanan sa barangay kag ang iya mga constituents.
Suno diri, handa ini nga ipakita ang iya mga bank statements kag mga propedad agud mapamatud-an nga legal kag insakto ang proseso sang iya mga kwarta.
Ginhangkat sini ang mga opisyales sang National Bureau of Investigation (NBI) nga magresign kun mapamatud-an nga wala ini sang kaangtanan sa illegal STL.
Kun mapamatud-an naman sang ahensya nga siya ang financier, siya mismo ang magahalin sa pwesto bilang punong barangay sang Barangay Tangub, Bacolod City.
