Gin-implementar sang Negros Oriental Provincial Police Office ang pagpatuman sang gun ban bilog nga probinsya, kasunod sang pag-assassinate kay Governor Roel Degamo.
Sa Facebook post, gin-anunsyar nga tanan nga permit to carry firearm outside residence (PTCFOR) ang suspendido sa Negros Oriental until further notice.
Dugang pa diri nga mga katapo sang Philippine National Police (PNP), Armed Forces of the Philippines (AFP) kag iban pa nga law enforcement agencies nga nagatuman sang official duties kag nakasuksok sang agency-prescribed uniforms lamang ang mapahanugutan sa pagbitbit sang armas-luthang.
Madumduman nga napatay si Governor Degamo kag walo ka iban pa samtang 13 naman ang pilason sa natabo nga pagpang-atake sang Marso 4 samtang nagapatigayon sang pagpanghatag sang bulig ang gobernador sa iya nga mga constituents sa ila mismo nga puluy-an sa banwa sang Pamplona.
Ginpasaka naman ang murder kag frustrated murder nga kaso batok sa apat ka mga suspetsado nga natumod nga sanday Joric Garido Labrador, Joven Calibjo Javier, Benjie Rodriguez, Osmundo Rojas Rivero kasubong man sa 12 ka mga John Does sa Tanjay City Regional Trial Court.
Samtang ginpasakaan man sang kaso nga illegal possession of firearms, ammunition, and explosives ang tatlo ka indibidwal sa Bayawan City Regional Trial Court.
Suno kay Justice Secretary Jesus Crispin Remulla, ginatun-an naman sang Department of Justice (DOJ) ang masobra 10 ka iban pa nga reports sang pagpamatay sa Negros Oriental.
Si Remulla, nga nagbisita sa haya ni Governor Degamo sang Miyerkules, kun sa diin ginpahayag sini nga sila ang nakakita sang “pattern of impunity” sa probinsya.
Ginpahayag naman ni Defense Secretary Carlito Galvez Jr. nga ang AFP ang magadeploy sang dugang nga mga military personnel sa Negros Island agud ma-address ang lawless violence kag mabalik ang kalinong sa probinsya kasunod sa pagpatay kay Governor Degamo.
