Gin-athag sang opisyal sa Negros Oriental Police Provincial Office nga wala sang gunban nga ginpatuman sa probinsya kahapon.
Sa interview sang Bombo Radyo kay Police Lt. Col. Kym Lopez, ginkumpirmar sini nga wala sang gunban sa Negros Oriental.
Madumduman nga kahapon, nagpagwa sang anunsyo ang Facebook page sang Provincial Mobile Force Company (PMFC-NOPPO) kag Zamboanguita Police Station nga tanan nga permit to carry firearm outside residence (PTCFOR) ang suspendido sa Negros Oriental until further notice.
Dugang pa diri nga mga katapo sang Philippine National Police (PNP), Armed Forces of the Philippines (AFP) kag iban pa nga law enforcement agencies nga nagatuman sang official duties kag nakasuksok sang agency-prescribed uniforms lamang ang mapahanugutan sa pagbitbit sang armas-luthang.
Suno kay Lopez, ila na ginpadelete kahapon ang nasambit nga post nga bangud indi ini matuod.
Sa karun ila pa ginahibalo kun sin-o ang nagpost sang nasambit nga announcement kag pagaistoryahan pa ang pagahimuon nga tikang tuhoy diri.
Samtang, ginpahayag naman ni Negros Occidental Police Provincial Office (NOCPPO) spokesperson Police Captain Judesses Catalogo nga wala sang crime record sa probinsya sanday Joven Javier, residente sang La Castellana kag Ricky Velle Espe, residnente sang Silay, nga nalakip sa mga nadakpan nga imbolbado sa assassination ni Negros Oriental Governor Roel Degamo.
