Nakaabot na ang mga suldado sa mga banwa sa probinsya sang Negros Oriental kun sa diin sila gindeploy kasunod sang assassination ni Governor Roel Degamo sang Marso 4.
Sa interview sang Bombo Radyo Bacolod kay Lt. Gen. Benedict Arevalo, commander sang AFP Visayas Command, nagbalibad ini nga maghatag sang figure sang mga suldado nga gindugang sang Visayas Command sa Negros Oriental, dugang sa special unit nga ginpadala sa probinsya.
Nagpadala man sang augmentation ang mga battalion sa idalom sang 302nd kag 303rd Infantry Brigade.
Suno kay Arevalo, ang dugang nga mga suldado ang gindeploy sa 1st kag 2nd District sang Negros Oriental bangud ini ang nakit-an nga nagakinahanglan sang dugang nga pwersa.
On stand by naman ang mga choppers sang Philippine Air Force bilang pagsuporta sa ila nga operasyon kaupod ang Philippine National Police.
Suno sa Visayas Command commander, maathag sa sugo ni President Ferdinand ‘Bongbong’ Marcos nga magabulig sila sa pagsuppress sang criminal activities sa Negros Oriental agud mabalik ang peace and order.
May assessment naman kun may pamahog sa kabuhi sang iban pa nga local officials sa nasambit nga probinsya agud nga sila ang maprotektahan kun may yara gid man.
Suno sa Army official, makakilibot ang brutal nga pagpatay kay Governor Roel Degamo gani naintindihan sini ang reaksyon sang mga tawo nga nahadlok gani nagmandu ang presidente nga ibalik nila ang kalinong sa probinsya.
Nagalaom naman si Arevalo na mangin malinong na ang sitwasyon sa Negros Oriental gani ila tinguhaan nga matuman ang ila nga trabaho.
