Ginpahayag sang spokesperson sang Soecial Joint Task Force-Negros nga anay katapo sang Philippine Army ang leader sang napulo ka mga tawo nga nagpatay kay Negros Oriental Governor Roel Degamo kag walo ka iban pa.
Sa interview sang Bombo Radyo Bacolod kay Major Cenon Pancito III, well funded, may kakunsabo kag may support system ang naghimo sang pagpatay sa gobernador.
Suno kay Pancito, ginatinguhaan sa karun sang mga otoridad nga matumod ang mastermind sa krimen.
Suno sa opisyal, santo sa description kag mga training, may yara sang rason ang mga otoridad agud nga magpati nga ang pila sa mga suspek ang anay miyembro sang Philippine Army.
Anum naman sa napulo ka mga ginalantaw nga suspetsado sa pagpatay sa gobernador kag walo ka iban pa ang nadakpan na samtang ang apat ang padayon nga ginalagas sang mga otoridad.
Suno diri, kritikal sa ila karun ang pagdakop sang apat nga nabilin bangud ini ang ila ginalantaw nga mangin palaagyan nga matumod mastermind ukon ang utok sang pagpatay sa gobernador.
Ginpahayag man sini nga ginapansanyog man sang Philippine Army kag Philippine National Police ang ila nga intelligence agud nga madakpan ang nabilin nga mga suspek.
Padayon naman ang ginapatigayon ang mga checkpoints sang mga gindeploy nga katapo sang Philippine Army sa 21 strategic areas sa probinsya sang Negros Oriental agud nga madakpan ang apat ka iban pa nga mga suspetsado sa Degamo assasination.
Sa karun wala pa sila nakahinun-anon sang Philippine National Police kag Philippine Army agud nga maestoryahan ang mga kaso nga napasaka na batok sa mga suspetsado.
Nagalaom ang Philippine Army nga mabalik na ang kalinong kag katawhay sang Negros Oriental.
Aminado man ini nga may yara sang nagakabatyagan nga kahangawa ang mga pumuluyo apang ginapasiguro sini nga paagi sa pagbuligay sang mga pumuluyo kag mga otoridad masolbar na ang nagluntad nga krimen.
Ginpahayag man ni Pancito nga ang pagdeploy sang tropa sang gobyerno sa probinsya ang nagapakita nga kun sin-o man ang nagahimo kalakasan ang magapanabat sa layi.
