Special Joint Task Force Negros, nagpasalig sang hugot nga seguridad sa lubong ni Negros Oriental Governor Roel Degamo bwasHugot nga seguridad ang igahatag sang mga suldado kag kapulisan sa lubong ni Negros Oriental Governor Roel Degamo bwas, adlaw sang Huwebes.
Ang mga Ceres buses nga sakyan sang magatambong sa lubong ang magabiya sa Capitol grounds alas-10:00 sa aga.
Ang bangkay ni Governor Degamo sa ila nga balay ang dal-on sa Bonawon Catholic Parish Church ala-1:30 sa hapon kag patigayunon ang misa alas-2:00 sa hapon.
Alas-3:00 sa hapon, igalubong ang gobernador sa ugsaran sang ila nga balay sa Bonawon, Siaton, tupad sa iya nga mga ginikanan kag utod.
Sa interview sang Bombo Radyo kay Major Cenon Pancito III, spokesperson sang Joint Task Force Negros, nagaupod ang mga suldado kag kapulisan sa paghatag sang seguridad sa kun diin man dal-on ang bangkay ni Degamo – halin sa Kapitolyo sa Dumaguete City padulong sa Siaton nga amo ang iya hometown.
Sa statement ni Siaton Mayor Cezanne (CE-ZAN) Fritz Diaz, hinablos ni Governor Degamo, nagpasalamat ini sa mga nagasuporta sa pamilya Degamo.
Ginwangal man ini sa mga alegasyon nga ginpapatay ni Mayor Janice Degamo ang iya nga bana.
Suno sa alkalde, makatulog siya sang maayo bangud malimpyo ang iya konsensya.
Ginhangkat naman sini si Congressman Arnie Teves nga magpauli na kag atubangon ang alegasyon batok sa iya.
Nagalaom man ini nga madayon na ang Senate hearing angot sa Negros Oriental killings kun sa diin magatambong sanday Mayor Janice Degamo kag Mayor Fritz Diaz.
Ginkumpirmar naman ni Pancito nga nakadeploy ang mga suldado sa 21 ka strategic areas sa Negros Oriental ilabi na sa 2nd kag 3rd District ukon southern Negros Oriental.
Suno kay Pancito, dako ang ila pagpati nga yara gihapon sa area ang mga bilin nga suspetsado sa pagpatay kay Degamo.
Suno diri, base sa CCTV footage, pulo ka mga indibidwal ang suspetsado sa krimen, anom ang naaresto kun sa diin isa ang patay sa pursuit operation, kag sa karun apat ka nabilin ang ila pa padayon nga ginalagas.
Hugot naman nga ginabantayan ang checkpoints, borderpoints, airports kag seaports nga mapagamay ang area nga ginapanaguan sang mga suspetsado.
