Nagapanawagan ang hepe sang Murcia Municipal Police Station sa mga pumuluyo nga may himata nga namissing nga sarang nga makakadto sa ila estasyon kay sila ang i-assist kun ini ang tul-an nga nasapwan nga nakasulod sa sako sa Barangay Damsite, Murcia, Negros Occidental kahapon.
Sa interview sang Bombo Radyo kay Police Major Joel Reclamado, yara na sa morgue ang tul-an kag ginahulat na lamang ang Scene of the Crime Operations (SOCO) para sa skeletal exams.
Suno kay Reclamado, pagatsekyaron man sang SOCO kun kumpleto ukon kulang ang bahin sang lawas sa skeleton nga nakit-an.
Suno sa iya, yara na sa decomposition stage sang nasapwan ang bangkay kag may gamay nga panit pa nga makit-an diri.
Dako naman ang posibilidad suno sa hepe nga sa lain ginhimo ang krimen kag ginhaboy lamang ini sa lugar.
Wala sang CCTV footages sang lugar bangud talamnan sang tubo ang area.
Sa karun wala pa matumod kun babaye ukon lalaki ang bangkay kag wala naman sang may nareport nga missing sa banwa.
Suno kay Reclamado, nagahulat ini nga may magkadto sa ila estasyon agud mag-inquire gani nagapanawagan ini sa mga nadulaan sang himata nga sarang gid nga makapadulong sa Murcia Municipal Police Station bangud sila ang handa nga mag-assist.
