Nagapati ang tagpamaba sang Bantay Bigas nga indi imposible nga P20 nga kada kilo sang bugas apang dapat isubsidize sang gobyerno ang presyo sini sa merkado.
Kahapon, ginpahayag ni President Ferdinand Marcos Jr. nga malapit na nga malab-ot sang pungsod ang promisa sini sang siya ang nagakampanya nga mangin P20 ang kada kilo sang bugas.
Ini ang iya ginpahayag sa launching sang Kadiwa ng Pangulo sa Camarines Sur kun sa diin ginabaligya ang bugas sa kada outlet sang P25 kada kilo.
Sa interview sang Bombo Radyo kay Cathy Estavillo, ginpahayag sini nga sa realidad, suli ang nagakatabo bangud ginreport sang Department of Agriculture nga nagsaka ang presyo sang bugas sa pungsod.
Suno kay Estavillo, sa una nga semana sang Marso, nagsaka sang P4.00 ang kada kilo sang well-milled rice samtang P1.00 tubtob P2.00 naman ang ginsaka sang kada kilo sang regular milled rice.// Sa karun, P42 ang pinakamanubo nga presyo sang regular-milled nga rice.
Suno sa iya, ang P25 nga presyo sa Kadiwa ang daw kaangay lamang nga band-aid kag limitado lamang ang sarang nga mabakal sang mga consumers bangud pagkatapos sang isa ka adlaw, ini ang ubos na.
Dugang pa sini nga ang mga Kadiwa stores ang dapat ginahamtang sa mga merkado kag dapat sustained ang P25 per kilo nga presyo sang bugas.
Nagapati ini nga samtang liberalize ang rice industry, indi malab-ot ang P20 nga kada kilo sang bugas kag dapat ilatag sang Presidente kun paano sini malab-ot ang iya nga handom.
Suno sa tagpamaba sang Bantay Bigas, posible nga matabo ang pagpanubo sang presyo sang bugas apang dapat may maathag nga plano ang Presidente kun paano ini malab-ot.
Suhestiyon sini nga dapat maghimo ini sang Executive Order nga nagasiguro sang subsidy sa mga mangunguma bangud madugay na nila ini nga ginapangayo.
Suno kay Estavillo, dapat ang gobyerno ang magbakal sang palay sa mga mangunguma kag sila ang magapamill diri agud nga ang gobyerno man ang magasalo sang presyo sini sa merkado.
