Ginkumpirmar sang Deputy Chief sa Ilog Municipal Police Station nga napatay ang isa sa mga imbulbado sa ginpatigayon nga anti-illegal gambling operation sa Barangay Dancalan, Ilog, Negros Occidental pasado alas-9:00 kagab-i.
Suno kay P/Executive Master Sgt Joemel Villavecencio, ang operasyon ang ginpatigayon sa pagpanguna sang hepe nga si P/Capt Thursley Castillo, matapos nga sila ang nakabatun sang reklamo gikan sa mga residente nga madamo sang nagapakigbahin sa iligal nga panahor nga Caracruz ukon Hantak.
Pagdangat sang kapulisan, naabtan sang mga ini ang kapin 15 ka mga indibidwal nga nagapusta sa panahor gani samtang nakasuksok sang civilian uniforms, nagdeklarar ang mga ini sang raid.
Yara na sa kamot sang hepe ang mag-utod nga sanday Abundio Redoble kag Mark John Redoble, apang sang magkinagamo, hinali na lamang sang duha nga ginbuno si Castillo gamit ang kutsilyo.
Ang hepe ang nakaangkon sang pilas sa nawala nga paa, idalum nga bahin sang likod kag sa siko, apang yara naman sa karun sa maayo nga kahimtangan.
Ginapakamaayo naman ni Villavecencio nga maayo mangamot ang hepe, gani bilang self defense nahimo sini nga maluthangan ang mag-utod nga suspetsado nga nagresulta sa kamatyon ni Abundio Redoble samtang yara naman sa kritikal nga kondisyon si Mark John Redoble nga nakaangkon sang igo sang bala sa leog.
Magluwas sa mag-utod, naiguan man sa natuo nga kamot ang isa ka menor de edad matapos nga ini ang nagbulig man sa pagpuli sa hepe, bangod stepfather sini ang napatay nga suspetsado.
Sa karun ang bata ang temporaryo nga ginhold sa Ilog Municipal Police Station kasubong man ang isa pa ka nadakpan nga persona, para sa nagakaigo nga disposisyon.
