Dako nga bugal para sa Rafael B. Lacson Memorial High School sa Talisay City matapos nga magviral ang “Galaw Pilipinas” performance nga ginpartisiparan sang masobra 4 mil nga mga estudyante sang Biyernes, Marso 17 kadungan sa ila nga Area Meet.
Suno kay Andres Guilaran Mabalon Jr., MAPEH Teacher sa nasambit nga buluthuan, nga sa ginpatigayon nga area meet sang Department of Education (DepEd) Division of Silay City, ang Talisay City amo ang nagserbe nga host sa diin ila nga ginduso ang “Galaw Pilipinas” performance sa opening mismo sang programa.
Paathag ni Mabalon nga kabisado na sang mga estudyante ang saot bangod ini ang kabahin na sa calisthenic workout program sang DepEd agud ma-imprubar ang physical health sang mga estudyante.
Suno pa sa MAPEH teacher nga apat lamang ka adlaw ang ila nga nangin practice kun sa diin sila ang nag-umpisa sa review ukon memorization sang steps sang Lunes kag Martes samtang nagpolishing na sila sa oval sang Miyerkules kag Huwebes tubtob na sa actual performance sang Biyernes.
Kabahin sa pagpanghangkat sa mga ini amo ang pagdisiplina sang kapin 4 mil nga mga kabataan, apang bangod sa pagpartisipar sang principal, mga advisers pati na sang mga intern teachers, madinalag-on nga nahimo ang programa.
Nangin dako man nga kabudlayan ang init bangod sila ang nagapractice alas-7:00 tubtob alas-10:00 sang aga kag alas-2:00 tubtob alas-4:00 sang hapon.
Suno kay Mabalon, madamo sang mga kabataan ang nagareklamo bangod sa kainit kag kayab-ok gani ginalahugan niya ang mga ini sa pagtawag nga 4,000 bashers.
Apang matapos ang performance kag nakita ang pagtrend sa social media, dako man nga bugal para sa kabataan, eskwelahan pati na sa division ang ila nangin achievement ilabi na nga indi mahapos nga masynchronize ang hulag sang 4 mil nga mga kabataan.
Ginakalipay man sini ang nakita nga suporta gikan sa mga ginikanan sang iban nga kabataan kun sa diin, nagalantaw na sa practice pa lamang, samtang overwhelming man ang attandence sang mga ginikanan sang mga dancers sa mismo nga opening sang Area Meet.
Sa karun suno kay Mabalon, nagapadayun pa ang mga pahampang gani wala pa na-estoryahan ang posibilidad sang pagpakigbahin sang achievement sa Guinness World Record.
