Mas kumporme ang isa ka market vendor nga magbaligya sa sulod sang Annex Building kumparar sa anay pwesto sini sa gwa sang Libertad Public Market.
Tubtob sa karun wala pa sang natalana nga schedule ang raffle sa maka-avail sang pwesto sa Annex Building.
Sa inteview sang Bombo Radyo sa manugbaligya nga si Mary Jean Villaester, wala ini nagduha-duha nga batunon ang ginhatag nga oportunidad nga magplastar sang ila baligya sa Annex Building nga sila pa mismo nagpili sang ila pwesto.
Sa karun itatatlo na sini nga semana nga nagpwesto sa sulod kaupod ang duha man ka awardee.
Suno diri, mas nangin matawhay ang pagnegosyo sini nga indi na mainitan kag maulanan ang iya baligya.
Nagaginansya man ini sang maayo ilabi pa nga malapit ang pwesto sini sa entrance.
Wala naman ini nagakabalaka sa ila nga safety kag seguridad sang ila baligya nga may yara sang naka-estasyon nga gwardya didto para magbantay sa merkado.
Kada ika-20 nga petsa sang bulan naka-schedule ang pagbayad nila sang P605 nga arkila para sa pwesto sa Annex Building.
