Gin-ako sang Bacolod City Water District nga kulang ang supply sang tubig sa ciudad kag ginatinguhaan pa nga ini ang madugangan.
Sa interview sang Bombo Radyo kay BACIWA General Manager Mona Dia Jardin, gin-ako sini nga may mga barangay nga wala sang water supply sa bilog nga adlaw ilabi na sa sur nga bahin sang Bacolod.
Ginaaddress naman nila ang turbidity sang tubig ukon malubog nga tubig bangud 60 ka deep wells ang mayor sang source nga indi gid malikawan ang tina kag manganese.
Suno kay Jardin, untatan na nila ang pagkutkot sang deep wells kundi gin-impose na ang pagkuha sang surface water nga matin-aw.
Suno sa BACIWA general manager, indi malikawan ang paglubog sang tubig bangud kinahanglan ang consistent flushing sang mga tubo.
May tatlo naman ka proponent para sa surface water kun sa diin isa ka surface water source ang magatubod sa 3rd quarter sang subong nga tuig 2023 samtang ang duha naman ang magatubod sa tuig 2025.
Suno sa iya, isa ka pribado nga kompaniya ang nagpromisa nga magapatindog sang water treatment plant, isa sa norte kag isa ka sur nga bahin sang ciudad.
Suno kay Jardin, dalagko nga source sang tubig ang tatlo ka proponent nga katumbas na sang existing nga supply kag ginatinguhaan nga mahitso ang kontrata subong nga tuig agud nga makatubod na sa tuig 2025.
Isa naman ka adlaw ang aktibidad sang BACIWA kag Prime Water kadungan sang World Water Day agud ipahibalo sa mga tawo ang importansya sang tubig sa kabuhi sang tawo.
Kaina sang aga, isa ka mangrove planting activity ang ginpatigayon sang BACIWA sa Barangay Punta Taytay nga ginpakigbahinan man sang iban nga ahensya sang gobyerno agud nga mapreserve ang watershed.
