Nakigkita si Justice Secretary Jesus Crispin Remulla sa siyam ka mga alkalde gikan sa Negros Oriental kalakip na ang asawa sang ginpatay nga si Governor Roel Degamo, agud diskusyunan ang peace and order situation sa probinsya.
Suno kay Remulla, na-apresyar gid sang mga alkalde nga sila ang wala naga-untat kag padayun ang pagtrabaho, kun sa diin naghatag man ang mga lokal nga opisyal sang dugang nga mga detalye sa mga nagakatabo sa Negros Oriental kalakip na ang mga dokumento nga mahimo makabulig sa imbestigasyon.
Dugang pa sang Justice Secretary nga ginakalipay man ni Pamplona Mayor Janice Degamo, ang balo sang gobernador, nga padayun ang pagtrabaho sang Department of Justice sa kaso.
Suno pa diri, ang mga alkalde ang naghatag sang mga impormasyon natuhoy sa pattern sang mga hitabo sa probinsya.
Pahayag ni Remulla nga ginatrace nila ang posibilidad sang iban pa nga mga kaso nga mahimo pa nga mafile, pinaagi sa pag-examine sa build up sang mga kaso.
Bangod sa case build up pa lamang, pahanumdom ni Remulla nga indi pa sila makapagwa sang mga impormasyon nga premature pa lamang magluwas kun ini ang napamatud-an na sa ila nga imbestigasyon.
Madumduman nga una naman nga ginpahayag ni Remulla nga nakakita sila sang “pattern of impunity” sa Negros Oriental matapos ang pagbisita sini sa haya sang ginpatay nga gobernador sang Marso 8.
