Ginkumpirmar sang chairperson sang committee on finance sa Sangguniang Panlungsod sang Bacolod nga nagrequest si Bacolod City May Alfredo Benitez sa ila nga hatagan sang authority to sign para sa P5.5B loan agreement sa Landbank.
Sa interview sang Bombo Radyo Bacolod kay Councilor Thaddy Sayson, Landbank of the Philippines ang napili sang alkalde bangud mas manubo ang 3.70 percent nga fixed interest rate kag magahatag man sila sang 3-year grace period.
Suno kay Sayson, ang Development Bank of the Philippines nga isa sa mga nagsubmit sang proposal ang may P3.75 percent interest rate nga offer sa siudad.
Apang suno diri, ila anay gin-defer ang request sang alkalde sa ginpatigayon nga session kahapon bangud tinutuyo nila nga mag-imbitar sang tiglawas sang nasambit nga bangko agud magpaathag sang kaundan sang proposed loan agreement.
Ang loan ang payable sa sulod sang 15 ka tuig kag indi man ini pagwithdrawhon sang tingob agud nga amat-amat man ang pagbayad sini.
Ang P5.5B loan agreement ang para sa pagtukod sang Legislative Building sa likod sang Bacolod City Government Center, makabakal sang duta para sa bag-o nga patyo, expansion sang landfill sa Barangay Felisa kag landbanking.
Ginpahayag man ni Sayson nga kabahin man sang pagagastuhan sang loan amo ang pagparepare sang old city hall bangud madamo sang mga national agencies ang luyag nga magrenta sang mga building spaces kag mahimo sila magrenta sang old city hall kun mapakay-o na ini nga makabulig pa sa ekonomiya sang syudad.
