Gina-engganyo sang Regional Corporate Communication Officer sang National Grid Corporation of the Philippines (NGCP) Visayas ang tanan nga makigbahin sa pag-obserbar sang Earth Hour bwas nga adlaw.
Sa interview sang Bombo Radyo kay Michelle Visera, gina-engganyo sini ang mga pumuluyo nga mag-isa sa pagconserve sang energy paagi sa pagpatay sang suga kag mga appliances humalin alas 8:30 tubtob alas 9:30 sang gab-i.
Suno kay Visera, dako ang mangin impact sini sa kalibutan ilabi na nga nagasaka sa karun ang power demand.
Ginpakigbahin man sini ang mga “Tipid Tips” lakip na ang pagtinlo sang filter sang aircon kada anum ka bulan, paggamit sang LED (light-emitting diode) bulb agud makaconserve, masami nga pagtsekyar sang rubber sang refrigerator kag indi pagpabay-an ang mga appliances sa standby mode.
Nagpasalig man ini nga sa pag-obserbar sang Earth Hour, ang mga line personnel sang NGCP ang 24/7 nga nakastandby kag may nakaduty man nga mga engineers sa mga substation.
Dugang pa sini nga preparado ang NGCP sa tanan nga tion.
Magapakigbahin man ang Provincial Government sang Negros Occidental sa patigayunon nga Earth Hour bwas nga adlaw.
Sa interview sang Bombo Radyo kay Governor Eugenio Jose “Bong” Lacson, kada katapusan nga Sabado sang Marso, gina-obserbar ang Earth Hour kag bwas nga adlaw, magasugod ang programa sa Ayala Malls Capitol Central alas 7:30 sang gab-i apisar nga ang lights off ang humalin 8:30 tubtob 9:30 sang gab-i.
Magluwas sa Kapitolyo, iga-off man ang mga security lights sang iban pa nga ahensya sang gobyerno apang may mga security personnel sa gihapon nga alerto nga magabantay.
Ginahangkat sang gobernador ang mga Negrense nga makigbahin sa nasambit nga aktibidad kag nagpanawagan man ini sa mga may malain nga tuyo nga indi pag-itake advantage ang ini nga tion kundi makigbahin na lamang sa pagconserve sang enerhiya.
Nagpanugyan man ini nga indi lamang bwas nga adlaw magconserve sang energy kundi adlaw-adlaw kag ginpakigbahin sini nga nagaplano ang Provincial Government nga magpasar sang isa ka ordinansa ng nagarequire sa mga local government unit nga maggamit sang renewable energy ukon ang 10 percent sang ila electricty ang magagikan sa renewable energy.
Samtang, nagpatigayon man kaina sang udto sang Earth Hour ang mga opisina sa Provincial Capitol.
Suno kay Provincial Administrator Atty. Rayfrando Diaz, kaina sang udto, nagbuylog tanan nga department kag office heads sa pagpatay sang ila mga electricity.
Nagpangagda man ini sa patigayunon nga programa bwas nga adlaw sa Ayala Malls Capitol Central kun sa diin may mga ginpang-imbita nga speakers agud maghatag sang lecture.
