Welcome development para sa Presidente sang Bacolod City Public School Teachers Federation ang anunsyo sang Commission on Elections nga makabaton sang mas mataas nga honorarium ang mga manunudlo nga magaserbi sa Barangay and Sangguniang Kabataan elections.
Sa isa ka press briefing, ginpahayag ni Comelec Chair George Garcia nga ang election board chairpersons, members kag support staffers sa October 30 elections ang makabaton sang tag-P10,000; P9,000 kag P8,000.
Sa interview sang Bombo Radyo kay Richard Gelangre, welcome development ang nasambit nga anunsyo para sa ila kag nagalaom ini nga ini ang magtupa gid.
Suno kay Gelangre, sang nagligad nga Eleksyon, ginbalita nga dako man ang mangin increase sa honoraria sang mga board of election tellers apang daw ginrepackage lang nila agud magwa nga dako.
Gani nagalaom ini ng subong nga tion, mangin sincero na gid ang Comelec sa pagpasaka sang allowance sang mga manunudlo nga magaserbi sa Eleksyon.
Dugang pa sini nga malakip pa ang Constitutional Convention gani mas magadamo na gid ang ila nga trabaho.
Suno sa iya, awat pa sa mga manunudlo ang increase sa honoraria bangud dako man nga tion kag emosyon ang ila igahatag para diri.
Ginakahangaw-an lang sini ng mga akusasyon sa resulta sang Eleksyon kag ma-harass ang mga manunudlo nga naga-ubra lamang sang ila trabaho.
Suno kay Gelangre, ang mga magaserbi sa palaabuton nga Eleksyon ang handa gid nga magserbi kag magsakripisyo gani ila man ginalakipay ang pahayag sang Comelec nga mas mataas nga honoraria ilabi na sa karun nga may yara sang krisis kag mataas nga inflation.
