Nagapangagda ang Provincial Environment Management Officer sa mga pumuluyo nga magtambong sa programa tuhoy sa Earth Hour nga patigayunon sa Ayala Malls Capitol Central karun sa gab-i.
Sa interview sang Bombo Radyo kay Atty. Julie Ann Bedrio, ang programa nga ginapangunahan sang Provincial Government ang patigayunon sa Activity Center sang Ayala Malls Capitol Central kag magasugod alas 7:30 sang gab-i.
Pagka-alas 8:30 sang gab-i, pagapatyon ang mga non-essential lights sa nasambit nga mall kag sa Provincial Capitol sa sulod sang isa ka oras.
Pagkatapos sang lights off, may patigayunon nga environment forum kag may mga magahatag sang performance nagikan sa nagkalain-lain nga buluthuan kag unibersidad.
Suno kay Bedrio, ang environment forum ang magafocus sa conservation sang dunang manggad kag kalasangan.
May mga opisyal man nagikan sa Central Negros Electric Cooperative (CENECO) nga magahatag sang inputs.
Suno sa PEMO Officer, tinutuyo sang sini nga movement nga magpahanumdum sa mga pumuluyo nga magconserve sang energy kag kun ano ang epekto sini sa kalibutan nga atun gina-istaran.
Suno sa iya, ang ini nga henerasyon ang makaubra sini kag makabulig agud mapahagan-hagan ang pag-init sang atun nga planeta.
