Nagapanawagan ang mga opisyal sang Bureau of Internal Revenue ukon BIR sa mga tax payers nga magbayad sang ila nga annual tax sang mas temprano kag indi na paghulaton ang deadline sa Abril 17.
Sa interview sang Bombo Radyo Bacolod kay Revenue District Office 77 Head Rommel Morente, bangud nagahilapit na ang deadline sang filing sang annual income tax returns sa individual kag corporate.
Suno kay Morante, sila liwat ang nagakampanya sa mga tax payers nga magbayad sang temprano agud nga malikawan ang rush.
Gin-anunsyar man ni Morante agud nga mahatagan sang solusyon ang mga problema sang mga tax payers, ginmanduan ang mga ini sang national office sang nasambit nga ahensya nga magbutang sang Tax Tulungan Centers sa mga malls sa syudad sang Bacolod nga igaassist sang revenue officers ang mga tax payers.
May yara man sang payment channels ukon pila ka bangko kun sa diin mahimo magbayad sang buwis ang nagcommit nga mahimo palawigon ang transaction hours tubtob sa Sabado agud macater ang mga tax payers antes ang deadline.
Padayon naman nga ginapasanyog sang ahensya ang ila nga tax paying venues agud nga mangin convenient sa mga taxpayers.
Nagaapelar naman ang pinuno sang Bureau of Internal Revenue – Revenue Region No. 12 sa syudad sang Bacolod sa mga tax payers nga buligan ang gobyerno nga makatipon sang pondo paagi sa pagbayad sang insakto.
Sa interview sang Bombo Radyo Bacolod kay Director Mary Jane Asuncion, naga-apelar ini sa mga tax payers nga magbayad sang husto nga buwis agud nga mabuligan ang gobyerno nga makatipon sang pondo agud nga may gastuhon sa mga infrastructure projects kag sweldo sa mga empleyado sang gobyerno.
Nagaapelar man si Asuncion sa tanan nga mga tax payers nga magfile sang ila nga annual income tax returns para sa tuig 2022 sang mas temprano agud malikawan ang paglagas sang deadline.
Suno diri, mahimo makabayad sa regional district office sang ahensya ukon sa mga BIR authorized and accredited sang wala sang penalty antes ang deadline sa April 17.
