Ginpatay sang linibo ka mga Pilipino ang wala ginagamit nga mga suga bilang pag-upod sang pagobserbar sang Earth Hour kagab-i.
Ini ang gin-organized sang World Wildlife Fund (WWF), ang tuigan nga kahiwatan sa pag-engganyo sa mga indibidwal, komunidad kag mga negosyo nga ipatyon ang mga wala nagamit nga suga halin alas 8:30tubtob 9:30 ang takna sang kagab-i bilang symbolo sang commitment sa kalibutan.
Diri sa syudad sang Bacolod, pila ka mga establisyemento ang nagpatay man sang ila suga humalin sa alas 8:30 tubtob 9:30 ang takna kagab-i.
Isa man si Negros Occidental Governor Eugenio Jose “Bong” Lacson nga nagpanawagan nga ugyunan ang Earth Hour agud nga ipakita nga willing ang mga pumuluyo nga maghimo sang tikang agud nga mapahagan-hagan ang pagkaguba sang kalibutan bangud sa climate change.
Kadungan sini madamo man sang mga aktibidad nga ginpreparar ang duha ka malls sa syudad sang Bacolod sa pag-obserbar sang Earth Hour.
Ginkalipay sang Regional Marketing Manager sang Robinsons Place Bacolod nga madamo sang ila nga mga customers kag stakeholders ang nagbuylog sa ila pag-obserbar sang Earth Hour.
Kabahin sang ila ginpreparar nga programa ang pagsaot sang Dragon fire dancers sang Bacolod.
Suno kay Shiela Malubay antes ang lights off nagpatigayon sila sang exhibit nga magalawig tubtob subong nga adlaw sa Atrium sang nasambit mall.
Nagbutang man sila sang freedom wall kun sa diin ang tagsa-tagsa ang nagsulat sang commitment sa paghagan-hagan sang pagguba sang kalibutan bangud sa climate change.
Nagsindi man sila sang 60 ka kandila nga nagapakita sang pagsuporta sa Earth Hour.
Nagpanugyan man ini sa mga pumuluyo nga wala lang natapos ang pag-amlig sa kalibutan sa isa ka oras nga pagpatay sang wala ginagamit nga suga ukon EARTH HOUR kundi dapat nga padayunon ini adlaw-adlaw.
Samtang, ginpangunahan naman ni Negros Occidental Governor Eugenio Jose “Bong” Lacson ang paglights offs sa Ayala Malls Capitol Central kun sa diin gin-updan sang mga estudyante nagikan sa nagkalain-lain nga eskwelahan sa Bacolod kadungan sang obserbasyon sang Earth Hour.
Nagsindi man ang mga ini sang kandila bilang pagpakita sang suporta sa Earth Hour.
Suno kay Michelle Ledesma, Marketing manager sang nasambit nga mall nalab-ot nila ang target nga 50 percent sang non-essential nga suga ang ila ginpatay bilang pagsuporta sa Earth Hour.
Sa paglibot sang Bombo News Team… madamo man sang mga establisyemento kag mga puluy-an ang nagpatay sang ila mga suga.
Kalakip sa nag-obserbar sang Earth Our ang Bacolod New Government Center, Bacolod City Plaza kag Bacolod Old City Hall.
Samtang sa probinsya naman, isa ang syudad sang Cadiz sa nagpatigayon sang mga aktibidad sa pag-obserbar sang Earth Hour.
