Patay ang mag-iloy samtang pilason ang isa pa ka bata sa nagluntad nga shooting incident sa Hacienda Ledesma, Barangay Matab-ang, Talisay City, Negros Occidental kagab-i.
Ginkilala ang mga biktima nga sanday Shirley Española, 50 anyos, Jason Española, 28 anyos kag John David Española, walo ka tuig.
Sa interview sang Bombo Radyo sa bana nga si JoseMars Española, ang iya mag-iloy ang nagikan sa city proper agud nga mangompra matapos nga nagdaog sa Small Town Lottery ang asawa sini kag sang nagpauli ang mga ini nga nagasakay sa motorsiklo, ginpangtiro ang mga ini sang wala makilal-an nga mga suspetsado.
Sang nagpadulong ini sa crime scene, nakita nila nga nagahamyangon sanday Shirley kag Jason nga nagapaligo na sa kaugalingon nga dugo.
Napatay sanday Shirley kag Jason samtang ang walo ka tuig nga bata ang ginhingagaw dala sa Corazon Locsin Montelibano Memorial Hospital.
Suno diri, may yara sila sang nabatian nga tatlo ka lupok antes pa man nakita nga nagahamyangon na ang mag-iloy sini.
Ginalantaw man sini nga ang ila kontra ang may kahimuan bangud ang ila bata sadto nga si Jason ang napriso bangud sa child abuse nga kaso nga ginpasaka sang pamilya Mariveles nga ila kontra apang sa ulihi nakagwa man ang ila bata.
Magluwas sini nagpasakaay pa ang magtimbang nga bahin sang kaso kag natalana nga mag-atubangay liwat sang Biyernes apang ginpaisol sang ila kontra apang natabo na ang insidente.
Samtang ginpahayag naman ni Victoria Española, asawa ni Jason, ginhagad ang bana sini sang iya iloy nga magpadulong sa city proper bangud may baklon ini.
Gin-updan man sang iya bana ang iloy sini agud nga mangompra.
Gintawgan naman sila sang ila tupad balay agud pahibaluon sang natabo nga insidente.
Sang nagdalagan na ang ugangan sini, ang amay sang biktima kag ang iya bayaw, nataranta ini kag nagdalagan man apang wala nakahibalo kun sa diin mapadulong tubtob nga nakalambot sa Matab-ang proper.
Nagbalik naman ini tubtob nga nakabati sang nagasinggit nga nangin giya man sini agud nga makita ang nagahamyangon na sini nga bana kag ugangan nga babayi.
Wala pa ini sang ideya kun ano ang motibo kag kun sin-o ang may kahimuan sang krimen.
Padayon pa ang imbestigasyon sang Talisay City Police Station sa nagluntad nga shooting incident sa Hacienda Ledesma, Barangay Matab-ang, Talisay City, Negros Occidental kagab-i kun sa diin napatay ang mag-iloy samtang nasamaran naman ang isa ka menor de edad nga bata.
Sa interview sang Bombo Radyo Bacolod kay Police Lt. Abegael Donasco, deputy chief of police sang Talisay City Police Station, sa inisyal nga imbestigasyon, papauli na ang mga biktima gikan sa city proper agud nga mangompra matapos nga nagdaog sa Small Town Lottery apang samtang nagasakay sa motorsiklo, sila ang gintiro sang wala makilal-an nga mga suspetsado.
Suno kay John Consalodo isa sa mga witness, nakabati ini sang kapin apat ka gun shots.
Suno kay Donasco, gintsekyar man sang nagresponder nagikan sa Talisay City Disaster Risk Reduction Management Office sanday Shirley kag Jason Española apang wala na ang mga ini sang vital signs.
Nagalaom man si Donasco nga makasurvive ang menor de edad bangud dako ang mabulig sini sa imbestigasyon sa nagluntad nga insidente.
Wala pa sa karun ang Talisay City Police Station sang persons of interest kag lead sa motibo sang krimen.
