Preparado na ang pag-deploy kag pagbantay sang mga kapulisan para sa palaabuton nga obserbasyon sang Semana Santa.
Sa interview sang Bombo Radyo kay Police Captain Judesses Catalogo, spokesperson sang Negros Occidental Police Provincial Office, kaangay sang trabaho sang mga kapulisan sa nakaligad nga semana santa, lauman nga mangin matawhay man sa gihapon ang karun nga selebrayon sang Holy Week apang suno diri lauman nga madamo sang matambong bangod nga makapatigayon na sang prusisyon kag sinakulo nga wala natigayon sang nakaligad nga tinuig sa kasagsagan sang pandemya.
Suno kay Catalogo, ekspektaran man ang pag-abot sang mga bisita gikan sa iban nga pungsod.
Plano man sini nga magtukod sang Police Assistance Desk sa mga terminal, plaza kag mga simbahan agud nga ma-akomodar ang kinahanglan nga bulig kag seguridad sang pumuluyo.
Samtang, nagpanugyan man ini sa publiko nga maghalong sa sunog kag aksidente nga posible magluntad sa karun nga summer vacation na.
Nagpaandam man ini nga isecure ang panimlay kun may plano nga mag lakat para magbakasyon kag kun ibilin nga wala sang tawo ang balay.
