Pagahatagan sang pagtamod sang chairman sang Committee on Education sang Sangguniang Panlungsod ang pahayag sang mga manunudlo sa ciudad tuhoy sa kakulang sang mga manunudlo apisar nga magahire sang dugang nga 9,000 ka panibag-o nga maestra ang Department of Education.
Sa interview sang Bombo Radyo kay Councilor Al Victor Espino, indi magnubo sa 127,000 ang populasyon sang mga estudyante humalin Grade 1 tubtob Grade 12 sa ciudad.
Suno sa iya, ang nagakadapat nga ratio amu nga isa ka manunudlo kag 45 ka mga estudyante kag aminado ini nga may kakulangan sang teaching personnel sa ciudad.
Suno diri, dapat nga batunon ang limitasyon kag posible nga maka-apelar ukon makakonsulta sa Department of Education.
Suno sa konsehal, ang concern sang Committee on Education amu ang nagakatabo sagwa sang eskwelahan kag iya jurisdiction sang DepEd ang nagakatabo sa sulod.
Apang kun apektado na ang mga kabataan, pagahatagan niya ini sang pagtamod kag ipalab-ot sa mataas nga level.
Suno sa iya, magapasar ini sang nagakaigo nga resolusyon sa SP kag ipadangat sa national government paagi sa opisina ni Congressman Greg Gasataya.
Pagahatagan man sini sang pagtamod kag tinguhaan nga mahimuan sang tikang sa masunod nga session ang paghatag sang summer vacation sa mga estudyante.
Suno kay Espino, nagakadapat nga mahatagan sang summer vacation ang mga estudyante bangud kinahanglan man sang mga ini nga magde-stress kag madivert ang ila paminsaron sa thought process.
Suno diri, lain ang nagligad nga duha ka tuig kun sa diin online ginpatigayon ang klase gani dapat nga ikonsiderar ang sitwasyon sa karun.
Nagapati ang konsehal nga importante may yara sang pahuway sa isa ka tawo kag nagakaigo nga panahon para diri.
