Tatlo ang patay lakip na ang isa ka pulis matapos ang isa ka rambol nga nagluntad sa pagsaksakanay sa Handy’s Restobar, Hacienda Bernabe, Brgy. Salvacion, Murcia, Negros Occidental kaina sang kaagahon.
Sa interview sang Bombo Radyo kay Police Major Mark Joel Reclamado, hepe sang Murcia Municipal Police Station, nagpadulong ang tatlo ka miyembro sang 2nd Negros Occidental Provincial Mobile Force Company nga nakabase sa Barangay Dulao, Bago City sa nasambit nga restobar kagab-i agud mag-inom.
Samtang nagainom, nagluntad ang komosyon sagwa sang restobar gani nagwa ang mga pulis agud kuntani magtambag sa mga imbolbado.
Apang imbes nga mag-untat, nadalahig sa gamo ang tatlo ka pulis kag iban pa nga mga lalaki nga nagainom.
Bangud sa madamo nga saksak sa lawas, napatay sanday Police Corporal Gabby Castillo sang La Carlota City; Marvin Guardavilla sang La Castellana kag Benedict Maguad sang Brgy. Zone 5, Murcia.
Samtang, pilason man sanday Police Staff Sergeant Namelou Sapuan sang Hacienda Bernabe, Brgy. Salvacion, Murcia; Police Staff Sergeant Jaytie Misme sang Tabao, Barangay Zone IV, Valladolid, Negros Occidental; kag isa pa ka sibilyan nga si Fernando Diaz sang Barangay Sta. Cruz, Murcia.
Sa pagresponde sang mga personnel sang Murcia Municipal Police Station, nadakpan sang mga ini ang mga suspects nga sanday Marjune Gallano, Jojie Gallano kag Ching Jingco nga lunsay mga residente sang Murcia.// Suno kay Reclamado, dala sang mga pulis ang ila mga service firearms apang wala man ini maggamit sa pagtambag sa ginamo.
