Nagapati ang chief executive officer sang Metro Bacolod Chamber of Commerce and Industry (MBCCI) nga senyales sang kapigaduhon ang nagakatabo nga mga krimen sa ciudad.
Sa interview sang Bombo Radyo kay Frank Carbon, sang damlag lamang ini nag-abot sa Bacolod nagikan sa Manila kun sa diin gindiskusyunan sang business sector kun ano ang mangin resulta sang kamahal sang pagkaon kag kakulang sang trabaho kag ini ang pagsaka sang krimen.
Suno diri, dapat ang business sector ukon ang confederation sang mga employers ang magtrabaho kaupod ang gobyerno agud mapanubo ang pagkaon.
Suno kay Carbon, bag-o gid lamang ini nakakita sang tuman ka brutal nga krimen sa iya kabuhi kag nagalaom ini nga makit-an ini sang national kag local government nga problema kag mangin madasig sa pagpanubo sang presyo sang pagkaon kag paghatag sang trabaho.
Nagapati si Carbon nga isa sa mga rason sang mga krimen amu ang ekonomiya gani ini ang dapat seryosohon sang mga otoridad.
Suno diri, samtang nagatrabaho ang kapulisan kag militar sa mga krimen, dapat trabahuon naman sang gobyerno ang pagpasanyog sang ekonomiya.
Nagpanugyan man ini sa mga negosyante nga tatapon ang komunidad kag environment, indi lamang ang atun nga bulsa.// Nagahingyo man ini nga pasugaan ang bilog nga Bacolod, butangan sang CCTV kag police visibility.
