Ginpakigbahin sang spokesperson sang Office of the Vice President ang madamo nga mga programa nga ginatanyag sang satellite office sang opisina ni Vice President Sara Duterte sa syudad sang Bacolod.
Sa interview sang Bombo Radyo Bacolod kay Atty. Reynold Musayac, ang nagapanguna nga programa sang satellite office sang bise presidente sa syudad sang Bacolod amo ang paghatag sang medical kag burial assistance.
Ang medical assistance ang ginahatag sang nagakinahanglan sang bulig sa ospital ukon inugbakal sang mga bulong sa botika.
Suno kay Munsayac, ini ang nagadangat sa P20 mil nga balor sang guarantee letters nga mahimo gamiton sa pagbayad sa ospital kag pagbakal sang bulong sa mga botika.
May yara man sang programa ang opisina sang bise presidente in partnership sa Department of Health kun sa diin ginasabat sini ang portion sang hospital bills, may yara man sang medical assistance for indigents program kaupod ang DOH.
Ang opisina sang bise presidente ang nagahatag sang burial assistance sa mga nagtaliwan na nga mga pumuluyo.
Suno kay Munsayac, ang P20 mil nga guarantee letter halin sa opisina sang presidente ang ginahatag sa kada indibidwal kag ini ang mahimo pa mapataasan kun ang ospital kun sa diin nakaadmit ang pasyente ang nagabaton sang guarantee letters.
Suno diri ang OVP satellite office sa syudad sang Bacolod ang nahamtang sa Mosser Building Lacson St. Ext., Goldenfield Complex, Barangay Sincang-Airport.
Humalin sang ginbuksan ang OVP satellite office sa Bacolod City nagdangat na sa 6000 ka mga pumuluyo ang nabuligan kag nagdangat sa P42 million na ang nahatag nga bulig para sa medical kag burial assistance.
Magluwas sini may yara man sang bus ang OVP satellite nga mahimo makahatag man sang bulig kun kinahanglan sa transportation ukon libreng sakay kag ini ang makasakay sang 50 ka mga pasahero.
Suno kay Munsayac, sa luyag nga mag-avail sang mga programa mahimo lang sila nga magbisita sa website nga https://ovp.gov.ph para sa mga requirements.
