Nakaagom sang pilas sa nawong kag iban pa nga bahin sang lawas ang anum ka tuig nga bata nga lalaki matapos nga ginlampos sang iya kaugalingon nga amay sa Barangay Zone 5, Pulupandan, Negros Occidental sang Marso 31, 2023.
Ginkilala ang amay nga si Rigor Galve, 29 anyos kag residente sa nasambit nga lugar.
Sa interview sang Bombo Radyo Bacolod kay Police Capt Emman Anacleto, hepe sang Pulupandan Municipal Police Station, nag-away ang mag-asawa kun sa diin nagwa ang babayi bangud ini ang sakiton kuntani sang iya nga bana samtang nabilin naman ang duha ka mga bata sa sulod sang balay.
Ang duha ka mga bata ang nagaedad sang walo ka bulan kag anum ka tuig.
Suno kay Anacleto, ginpukaw sang amay ang anum katuig nga bata agud pangitaon ang iloy kay kun indi ini makita siya ang sakiton.
Santo sa imbestigasyon sang Pulupandan Municipal Police Station, naggwa ang mag-amay agud pangitaon ang iloy apang wala nila ini makita rason nga gintiklod sini ang bata nga nagresulta sa pagkamumo sini apang wala pa natapos ang amay bangod iya pa ini nga gindakop kag ginlampos.
Nakaagom sang gasgas kag bukol sa nawong ang bata tuga sang pagkamumo kag paglampos sang iya amay.
Nagtambag naman ang tiyo sang bata kag nakita naman sang tiya sini ang iya sitwasyon gani ini ang gilayon nga gindala sa Rural Health Unit sa Pulupandan agud nga mahatagan sang nagakaigo nga pagbulong.
Ginreport naman sang health worker ang natabo sa Pulupandan Municipal Police Station.
Suno kay Anacleto sang nabaton nila ang complaint, nagpatigayon man sila sang hot pursuit operation sa nagpalagyo nga suspetsado.
Samtang gina-assists ang bata may nagreport naman sa mga kapulisan nga nakita nila ang suspect gani nagpatigayon sila sang follow-up operation kun sa diin nahimo nga madakpan si Galve.
Nakahunong si Galve sa karun sa Pulupan Municipal Police Station kun sa diin pormal na nga napasakaan sang kaso nga paglapas sa Republic Act 7610 ukon Special Protection of children Against Child Abuse, Exploitation and Discrimination Act.
Suno kay Anacleto, ginsaysay man sang bata kun ano ang natabo sa iya kag napaidalom naman ini sa medical examination.
Dugang pa sang hepe, ini ang una nga kahigayunan nga nasakit sang amay ang bata apang masami ini nga hubog kag ginapasingtan ang iya asawa.
Ang suspect, ang nahibaluan naman nga isa ka drug surrenderee sang banwa apang nagnegatibo naman ini sa ginpatigayon nga drug test.
