Magabutang sang temporaryo nga checkpoint kag pasanyogon ang monitoring sa Barangay Damsite, Murcia matapos nga duha ka beses na nga may ginhaboy nga bangkay sa lugar.
Sa interview sang Bombo Radyo kay Murcia Municipal Mayor Gerry Rojas, magabutang ini sang temporaryo nga checkpoint nga pagabatayan sang police personnels kag barangay sa highway sang Barangay Damsite.
Suno diri, iya pa gid pasanyogon ang monitoring sa area, ilabi na kun kagab-ihon.
Dako ang pagpati sang alkalde sang Murcia nga indi mga residente sang banwa ang tul-an sang tawo nga nasapwan nga nakasulod sa sako sang Marso 15, nga ila nalang ginpalubong, kasubong man ang bangkay nga nasapwan sang Marso 31 nga wala pa may nakaclaim.
Magapatigayon ini sang meeting kaupod ang PNP kag barangay officials angot sa insidente nga pagpanghaboy sang bangkay sa barangay.
Maga-request man ini sang augmentation gikan sa 303rd Infantry Brigade sang Philippine Army para sa dugang nga seguridad sa banwa sang Murcia.
