Patay ang 48 anyos nga drayber sang motorsiklo sang nabungguan sini ang isa ka tricycle kun sa diin pito naman diri ang pilason.
Nagluntad ang insidente sang pagbunggoanay sa Purok Mahirup, Barangay Busay, siyudad sang Bago sang Sabado, Abril 1.
Ang drayber sang motorsiklo ginkilala nga si Rolando Suello, 48 anyos, residente sang Hillside Subdivision, Barangay Mansilingan, Bacolod City, samtang ang tricycle driver naman amo si Benjie Magbanua, 44 anyos, kag ang mga pasahero sini amo sanday Sheena Marie Magbanua, 21 anyos, Roselyn Sunio, 19 anyos, Jonna Marie Plemones, 21 anyos, Michelle Sangria, 38 anyos, Glymaine Jaban, 18 anyos kag isa ka 17 anyos nga lalaki, lunsay mga residente sang Barangay Busay, Bago City.
Sa interview sang Bombo Radyo kay Police Lieutenant Ronald Jaro, Deputy Chief of Police sang Bago City Police Station, nagabyahe ang tricycle gikan sa brgy Busay padulong sa Bago proper, samtang ang motorsiklo naman ang sugata sini gikan sa opposite nga direksyon.
Apang, hinali nalang nag-agi ang motor sa lane nga sugata ang tricycle kag bangod nga madasig ang pagpadalagan sini, wala na nakahingagaw pa ang tricycle nga maglikaw.
Bangod sa collision, napatay ang driver sang motorsiklo nga si Suello samtang pilason naman ang pito ka sakay sang tricycle.
Suno kay Benjie, driver sang tricycle, kun mahinay ang pagpadalagan ni Suello sang motorsiklo, posible nga malikaw pa kun tani sini ang iya tricycle kag malikawan ang insidente.
Nahibaluan naman nga naggikan sa isa ka birthday party si Suello kag ini ang yara sa impluwensya sang makahulobog nga ilimnon.
