Wala sang pagbag-o sa presyo sang karne sang baboy kag baka sa pila ka merkado sa Bacolod bisan nakaandan na sang mga tumuluo sang Romano Katoliko ang pagpuasa ukon paglikaw sa pagkaon sang karne kun Semana Santa.
Sa interview sang Bombo Radyo sa meat vendor nga si Jason Abonilla, mahina gid ang baklanay sa karun nga tion sang Semana Santa.
Plano sini nga indi anay magbaligya sa Huwebes kag Biyernes bangod nga diutay gid lamang ang nagabakal kag ini ang ila kapierdehan, gani nagdesisyon ini nga magsira anay kag magbalik negosyo sa Lunes.
Wala naman sang pagbag-o sa presyo antes ang Semana Santa tubtob sa karun.
Ang kada kilo sang baboy ang nagabili sang P300 kag P340 naman ang kada kilo sang karne sang baka.
Samtang suno naman sa manugbakal nga si Malou Legazpi, nagapadulong ini sa merkado kada adlaw agud magbakal sang mga panakot para nga iluto kag ibaligya.
Suno diri, wala sang pagbag-o sa ila nga mga linuto kag ini ang padayon man sa gihapon nga magbaligya sang sud-an nga baboy kag baka sa Semana Santa.
Nakita man sini nga wala sang pagbag-o sa presyo apang diutay lang gid ang manugbakal sa karun nga tion sang Holy Week.
