Ginlunsyar kaina sang aga diri sa ciudad sang Bacolod ang Kadiwa sugar nga nagabili sang P70 kada kilo, bilang isa ka programa sang Sugar Regulatory Administration kag Department of Agriculture.
Sa interview sang Bombo Radyo kay Bacolod City Councilor Thaddy Sayson, chairman sang committee on agriculture and fisheries sa Sangguniang Panlungsod, 500 kilos ka kalamay ang nag-abot nagikan sa SRA kag ini ang ibaligya sa presyo nga P70 kada kilo kag gilayon man nga naubos.
Duha lang ka kilo ang sarang nga mabakal sang kada empleyado bangud para lamang ini sa household use kag paagi ini agud masiguro nga indi pagkumprahon sang isa lang ka indibidwal.
May yara naman sang sticker ang plastic sini agud masiguro nga indi ini mabaligya sa merkado.
Tinalikdan nga semana ginrelease ang kalamay kag igabalik sa ila ang capital kun maubos na kag liwat naman nga makakuha sang supply.
Subong nga adlaw, mga empleyado lang anay ang ginpabakal sang Kadiwa sugar apang kun maperpekto na ang sistema, buksan na ini sa mga merkado sa ciudad.
Santo sa pagsulundan, indi sarang mabaligya liwat ang Kadiwa sugar bangud household use ang katuyuan sini.
Nagpasalamat naman ang city government sang Bacolod sa SRA sa temprano nga paghatag sang kalamay samtang ginahulat pa ang pondo sang ciudad para diri.
