Ginpahayag ni Justice Secretary Jesus Crispin Remulla nga nagagwa nga si suspended Negros Oriental Representative Arnolfo “Arnie” Teves Jr. amo ang main mastermind sa pagpatay kay Negros Oriental Governor Roel Degamo.
Ginpaanggid ni Remulla si Teves sa isa ka “executive producer” sang pelikula samtang si Marvin Miranda, nga gina-alegar isa sa mga mastermind nga nadakpan sang mga otoridad tinalikdan nga semana, ang makabig nga “director ukon casting director”.
Dugang pa sang Justice Secretary nga si Teves ang ginalantaw sini nga main mastermind kag ini ang nagafinance sa pagpatay.
Paathag sini nga magluwas sa pagfinance, ang mga armas-luthang ang gikan man sa kongresista, kasubong man ang safehouse kag mga salakyan.
Gin-alegar pa sini nga ang kongresista ang naghatag pa sang helicopter nga magamit sang mga suspetsado.
Pahayag ni Remulla nga wala pa nila napagwa ang tanan nga ebidensya kalakip na ang mga testimonya.
Tinalikdan nga semana, sang ginpahayag ni Remulla nga 99 porysento na nga solve ang kaso, ginpahayag man sini nga yara sa tunga-tunga si Teves.
Sa pihak nga bahin, wala na nagsabat pa si Atty. Ferdinand Topacio, ang legal counsel ni Teves sa panibag-o nga alegasyon sang Justice Secretary kag ginpahayag nga ginahulat na lamang nila ang kun ano man nga kaso nga ipasaka batok sa iya kliyente kag ini ang atubangon sa proper forum.
Gin-athag naman ni Remulla nga si Miranda ang ginatumod sini sang ginhambal sadto nga isa sa mga suspetsado sa pagpatay ang nagvideo call sa mastermind, kun sa diin ila gina-estoryahan ang assassination plot.
Nagapati man si Remulla nga si Miranda ang indi lamang middleman kundi mastermind sa assassination.
Dugang pa sini nga si Miranda amo ang nagarecruit sang tawo, nagakuha sang armas kag ini ang imbulbado man sa pagkuha sang mga tawo para sa plano kag pagkoordinar sang hulag.
Kahapon sang hapon, si Miranda ang ginpaidalum na sa inquest proceedings sa Department of Justice (DOJ).
